مدينة الملايكة

موضوع: مدينة الملايكة السبت يونيو 14, 2008 2:20 am

النهاردة يوم زى كل أيام ربنا بصحى من نومى أبتدى أستعد عشان أروح شغلى مش لازم أتأخر لو أتأخرت هيتخصملى و المرتب مش ناقص يادوب بيمشينى و بحاول أحوش منه بالعافية عشان لازم أكون نفسى بس لو مشيت بالمعدل دة يبقى هتجوز بعد 30 سنة بس على العموم الحمد الله أنا بردة أحسن من غيرى اللى مش لاقيين فرصة شغل.

نزلت الشارع لازم أستعد كويس على فكرة أنا مش رايح أحارب أنا بس هركب الميكروباص الناس و لا التتار و السواقين بيعملونا بمنتهى التناكة يارب أعرف أركب الحمد الله بعد معاناه قدرت أركب و أروح شغلى فى الشغل مفيش حد طايق حد فى وشك الكل بيبتسم لكن من ورا ضهرك بيحاول يطردك من مكانك و يفضل هو الأحسن عند المدير , أما المدير دة حكاية لوحدة مبيبطلش زعيق كأنه أشترانا و عمل جميلة فينا لما شغلنا فى شركتة مع أن من غيرنا الشركة هتقف يعنى مش بيدينا مرتبنا و هو خسران زى ما بيحاول يقنعنا عشان منطلبش زيادة فى المرتب بعد ما خلصت شغلى روحت على البيت كل الى فى البيت شغالين تحكم فى العبد للله أنا حاسس مع أن ربنا خلقنى حر بس الكل بيستعبدنى فى الدنيا ديه فى البيت و الشارع و الشغل , بعد ما نمت شوية خرجت باليل أقابل واحد صاحبى على القهوة كالعادة فضلت أشتكيلة همومى قالى أنت عارف أن فى بلد جنبنا أسمها مدينة الملايكة رديت يعنى أيه قلى يعنى كل الناس الى فيها زى الملايكة مبيكدبوش مبيسرقوش مبيكرهوش بعض قلتلة معقولة أنا من الصبح هروح أعيش فى البلد دى , روحت نمت و صحيت من النوم الفجر صليت و خرجت من غير ما حد ياخد باله عشان الحق أوصل بدرى.

أول ما وصلت لقتها بلد جميلة شوارعها نضيفة يعنى مفيش حد بيرمى زبالة فى وسط الشارع , مفيش زحمة مفيش أتنين بيتخانقوا مع بعض من غير سبب كنت ماشى زى التاية لغاية ما لاقيت واحد بيوقفنى و بيقولى شكلك غريب عن البلد قلتله أه قالى و أكيد جاى تتفرج رديت عرفت منين قالى احنا كل قترة بيجى ناس تتفرج على بلدنا و انا المسئول أنى أخليك تقضى يوم معانا قالى أول حاجه هفرجك عليها نظام الشغل عندنا رحت معاه شركة لقيت الموظفين كل واحد على مكتبة مركز فى شغله يعنى متلاقيش حد واقف بيرغى مع حد و لا حد بيشيت كله مركز فى الشغل و بس و فى نفس الوقت صاحب الشغل بيديهم مرتبات محترمة على أد تعبهم بعد ما خلصنا نزلنا الشارع لقيت الناس ماشين زى الساعة كل واحد فى حالة مفيش حد بيتحشر فلى ملهوش فيه هو انتى لية يا بنتى متخطبتيش لحد دلوقتى لا لا مفيش الكلام دة بعد كده خدنى لمكان خدنى لمدرسة عشان اشوف نظام التعليم المدرسه كانت جميلة المدرسين بيشرحو بضمير و التلاميذ مركزين معاهم لقيت كمان ملعب واسع عشان يمارسو فيه رياضة و مكان واسع عشان يتعلمو فيه موسيقى و رسم و كمبيوتر بعد كده كانت اخر حاجة هاشوفها حى المستقبل قالى دا عباره عن شقق جديدة بتبنيها الدولة عشان الى هيتجوزو جديد و بتكون من غير مقابل قلتله معقول قالى طبعا دا حق أساسى للمواطن عندنا بعد ما خلصنا طلعنا على مستشفى من مستشفيات المدينة مستشفى حكومه لقتها أنضف من المستشفيات الإستثمارى عندنا و الكل بيعاملك معاملة البنى أدمين , بس كمان لقيت كل الى فى البلد بيشتغلوا حتى الأطفال و دة مبيعطلهومش عن دراستهم.

عشان كل واحد واخد حقة مفيش حد بيسرق و لا بيبص للى فى أيد غيرة بيحبو بلدهم بصحيح بيحاولو يكبروها عشان مفيش حد يتحكم فيهم

و فجأه لقيت ماما بتصحى فيا و هى بتقول قوم عشان تروح الشغل

يسلام كان حتة حلم............